وفاقی ایمرجنسی مینجمنٹ ایجنسی نے فیفا ورلڈ کپ 2026 کی تیاریوں کے سلسلے میں عوامی تحفظ کو مضبوط بنانے کے لیے ہیوسٹن شہر کو 65 ملین ڈالر کی فنڈنگ فراہم کر دی ہے۔ یہ اعلان اس وقت سامنے آیا جب میزبان شہروں کی کمیٹیوں کی جانب سے سیکیورٹی گرانٹس کی فراہمی میں ممکنہ تاخیر پر خدشات ظاہر کیے جا رہے تھے۔ میئر جان وٹمائر کے دفتر کے مطابق یہ رقم عالمی ایونٹ کے دوران شہر بھر میں اہم سیکیورٹی اقدامات کے لیے استعمال کی جائے گی۔
شہری حکام کے مطابق اس گرانٹ کو پولیس اور فائر ڈیپارٹمنٹ کے لیے اضافی ڈیوٹی کے اخراجات، مزید عملہ، جدید ٹیکنالوجی اور ضروری ساز و سامان کی فراہمی پر خرچ کیا جائے گا۔ اس کے ساتھ ساتھ یہ فنڈنگ ان علاقائی قانون نافذ کرنے والے اداروں کی بھی معاونت کرے گی جو ورلڈ کپ سیکیورٹی میں حصہ لیں گے۔
وفاقی ایجنسی کی جانب سے امریکا کے 11 میزبان شہروں کے لیے مجموعی طور پر 625 ملین ڈالر کے پبلک سیفٹی گرانٹس کا اعلان کیا گیا ہے۔ حکام نے اس بات پر زور دیا کہ یہ ٹورنامنٹ تاریخ کے بڑے ترین کھیلوں کے مقابلوں میں سے ایک ہوگا، جس کے لیے اعلیٰ سطح کی سیکیورٹی ناگزیر ہے۔ سینئر اہلکار کیرن ایونز کے مطابق 2026 کے ٹورنامنٹ کے حجم کو دیکھتے ہوئے جامع سیکیورٹی منصوبہ بندی ضروری ہے اور اس ضمن میں سیکیورٹی اولین ترجیح ہے۔
دوسری جانب ٹیکساس کے گورنر گریگ ایبٹ کے دفتر نے تصدیق کی ہے کہ ریاست کو اس پروگرام کے تحت مجموعی طور پر 116 ملین ڈالر ملیں گے، جبکہ اس سے قبل ڈرون سے متعلق ممکنہ خطرات سے نمٹنے کے لیے 30 ملین ڈالر کی الگ گرانٹ بھی منظور کی جا چکی ہے۔ ہیوسٹن میں ورلڈ کپ کا پہلا میچ 14 جون کو کھیلا جائے گا جس میں جرمنی اور کیوراساؤ کی ٹیمیں مدمقابل ہوں گی، جبکہ اسی روز ڈیلاس میں نیدرلینڈز اور جاپان کے درمیان ایک اور اہم میچ ہوگا۔ مقامی حکام کے مطابق جون اور جولائی کے دوران شہر میں غیر ملکی شائقین کی بڑی تعداد متوقع ہے۔ ہیوسٹن پولیس ڈیپارٹمنٹ کا اندازہ ہے کہ تقریباً پانچ لاکھ کے قریب شائقین، جن میں نیدرلینڈز، جرمنی، پرتگال اور سعودی عرب سمیت دیگر ممالک کے افراد شامل ہوں گے، شہر کا رخ کریں گے۔ شہری انتظامیہ کا کہنا ہے کہ یہ فنڈنگ ٹورنامنٹ کے دوران شہریوں اور مہمانوں کے لیے ایک محفوظ اور منظم ماحول فراہم کرنے میں کلیدی کردار ادا کرے گی۔
