مسلسل موسلا دھار بارش اور اچانک آنے والے سیلاب نے شمالی کیلیفورنیا کے مختلف علاقوں کو اپنی لپیٹ میں لے لیا، سڑکیں زیرِ آب آ گئیں، گاڑیاں پھنس گئیں اور متعدد افراد کو پانی سے نکالنے کی کارروائیاں کرنا پڑیں، جبکہ حکام کے مطابق پیر کے روز کم از کم ایک ہلاکت کی تصدیق ہوئی ہے۔کیلیفورنیا کی سینٹرل ویلی کے شمالی کنارے پر واقع شہر ریڈنگ میں ایک موٹر سوار اپنی گاڑی میں پھنس کر جان کی بازی ہار گیا، جہاں گاڑی تیزی سے پانی سے بھر گئی۔ میئر مائیک لیٹو کے مطابق متاثرہ شخص نے گاڑی میں پھنسے ہونے کے دوران ایمرجنسی سروسز کو کال کی تھی۔ پولیس کا کہنا ہے کہ پانی میں پھنسے ڈرائیوروں کی جانب سے ہنگامی کالز کی بھرمار ہو گئی تھی۔
میئر لیٹو نے بتایا کہ ریڈنگ پولیس کے ایک افسر نے تیز بہتے پانی میں تیرتے ہوئے گاڑی تک پہنچ کر شیشے توڑے اور متاثرہ شخص کو باہر نکالا۔ فوری طور پر سی پی آر دی گئی، تاہم متاثرہ شخص جانبر نہ ہو سکا۔نیشنل ویدر سروس کے مطابق ہفتے سے اتوار کی رات تک ریڈنگ کے علاقے میں تین سے چھ انچ تک بارش ریکارڈ کی گئی، جس کے باعث نکاسیٔ آب کا نظام اور نشیبی علاقے شدید متاثر ہوئے۔اگرچہ پیر کے روز بارش کی شدت میں کچھ کمی آئی، تاہم ہلکی بارش جاری رہی اور کئی سڑکیں اب بھی زیرِ آب رہیں۔ بلدیاتی عملہ ملبہ ہٹانے اور چھوڑ دی گئی گاڑیوں کو اٹھانے میں مصروف رہا۔ مقامی باشندے نقصانات کا جائزہ لیتے دکھائی دیے۔ ایک مقامی شہری ڈیکوڈا کروز گھٹنوں تک پانی میں چلتے ہوئے اپنے دوست کی ٹائر شاپ کا حال دیکھنے پہنچے، جہاں سیلابی پانی نے دفتر کا سامان بکھیر دیا اور ٹائر پانی میں تیرتے رہے۔شہری حکام نے خبردار کیا ہے کہ حالات مزید خراب ہو سکتے ہیں۔ ریڈنگ کے میئر نے آئندہ دنوں میں مزید شدید موسم کی پیش گوئی کرتے ہوئے شہریوں کو محتاط رہنے کی ہدایت کی۔ آئندہ طوفان سے قبل تیاری کے لیے شہر میں مفت ریت سے بھرے تھیلے تقسیم کیے جا رہے ہیں۔
ماہرین موسمیات کے مطابق کرسمس کے پورے ہفتے کے دوران شمالی کیلیفورنیا میں فضائی دریا کہلانے والے طوفانی سلسلے داخل ہوں گے، جس سے مسلسل بارش متوقع ہے۔ ساکرامنٹو ویلی اور آس پاس کے وسیع علاقوں میں جمعے تک سیلاب کا الرٹ جاری ہے۔فضائی دریا سمندر کے اوپر بننے والی نمی کی ایک طویل اور تنگ پٹی ہوتی ہے، جو استوائی علاقوں سے پانی کے بخارات کو شمالی خطوں تک لے جاتی ہے اور خشکی پر پہنچنے پر شدید بارش کا سبب بنتی ہے۔ محکمہ موسمیات نے خبردار کیا ہے کہ یہ موسمی نظام ہفتے کے وسط تک مزید طاقتور ہو سکتا ہے، جس سے مٹی کے تودے گرنے، پتھروں کے کھسکنے اور ندی نالوں میں طغیانی کا خطرہ بڑھ جائے گا۔ سیئرا نیواڈا کے بعض علاقوں میں برفباری چھ فٹ تک ہو سکتی ہے، جبکہ بلند علاقوں میں بدھ تک ہواؤں کی رفتار 55 میل فی گھنٹہ تک پہنچنے کا امکان ہے۔ نیشنل ویدر سروس کے مطابق کرسمس کے دن پہاڑی راستوں پر سفر انتہائی مشکل یا تقریباً ناممکن ہو سکتا ہے۔ جنوبی کیلیفورنیا بھی بارشوں کی لپیٹ میں آنے والا ہے۔ وینچورا کاؤنٹی کے بعض علاقوں میں ہفتے تک گیارہ انچ تک بارش کی پیش گوئی کی گئی ہے۔ لاس اینجلس کے کچھ حصے، خصوصاً وہ علاقے جو پالیسیڈز کی مہلک آتشزدگی کے باعث پہلے ہی حساس ہیں، منگل سے انخلا کی وارننگ کے تحت آ جائیں گے۔
محکمہ موسمیات نے شہریوں اور مسافروں کو مشورہ دیا ہے کہ تعطیلات کے دوران سفر کے لیے متبادل منصوبے بنائیں اور تازہ ترین صورتحال سے باخبر رہیں۔اس سے قبل رواں ماہ ایک طاقتور فضائی دریا نے واشنگٹن ریاست میں ایک ہفتے کے دوران تقریباً پانچ ٹریلین گیلن بارش برسا دی تھی، جس کے باعث دریا ریکارڈ سطح کے قریب پہنچ گئے تھے۔ ماہرین کے مطابق اس بارش کی شدت غیر معمولی حد تک گرم ہوا اور پیچیدہ موسمی حالات کے باعث بڑھی، جن کا تعلق انڈونیشیا کے قریب بننے والے ایک طوفان سے جوڑا گیا۔
