نیویارک کی شہری انتظامیہ نے اعلان کیا ہے کہ ہنگامی بنیادوں پر برف ہٹانے والے کارکنوں کی اجرت بڑھا کر 30 ڈالر فی گھنٹہ کر دی گئی ہے تاکہ صفائی کے عمل کو تیز کیا جا سکے۔
شہری حکام کے مطابق اجرت میں اضافہ اس بات کی عکاسی کرتا ہے کہ شہر کو معمولات زندگی بحال کرنے کے لیے فوری طور پر افرادی قوت کی ضرورت ہے۔ شدید برف باری کے باعث ٹرانسپورٹ کا نظام، پیدل چلنے والوں کی آمد و رفت اور روزمرہ سرگرمیاں متاثر ہوئی ہیں۔ بس اسٹاپس، کراس واکس اور فائر ہائیڈرنٹس برف تلے دب گئے ہیں جس سے عوام اور ہنگامی خدمات کو خطرات لاحق ہو سکتے ہیں۔
یہ عارضی کارکن روزانہ کی بنیاد پر بھرتی کیے جاتے ہیں اور ان کا کام اُن عوامی مقامات سے برف اور برفانی تہہ صاف کرنا ہے جہاں بڑی مشینری فوری طور پر نہیں پہنچ پاتی۔ ان کی خدمات سے مسافروں کو پبلک ٹرانسپورٹ تک محفوظ رسائی ملتی ہے اور ہنگامی صورتحال میں فائر ہائیڈرنٹس تک فوری رسائی ممکن بنتی ہے۔نیویارک شدید برف باری کے بعد بحالی کے مرحلے میں داخل ہو چکا ہے، جہاں کئی علاقوں میں سڑکیں اور گزرگاہیں برف اور برفانی تہہ سے ڈھک گئی ہیں۔
Department of Sanitation اس بھرتی عمل کی نگرانی کر رہا ہے۔ واک اِن درخواستیں پیر کو رات 8 بجے تک اور منگل کو صبح 9 بجے سے متعلقہ سینی ٹیشن گیراجز میں جمع کرائی جا سکتی ہیں۔ درخواست دہندگان کے لیے ضروری ہے کہ وہ دو عدد درست شناختی دستاویزات اور سوشل سیکیورٹی کارڈ ساتھ لائیں۔
حکام نے جسمانی طور پر فِٹ افراد کو درخواست دینے کی ترغیب دی ہے جو سرد موسم میں کام کرنے کی صلاحیت رکھتے ہوں۔ شہر انتظامیہ نے شہریوں سے غیر ضروری سفر سے گریز کرنے اور صفائی کے عملے کو کام کرنے کے لیے مناسب جگہ دینے کی اپیل بھی کی ہے۔ شہری انتظامیہ کا کہنا ہے کہ سڑکوں اور گزرگاہوں کی مکمل صفائی تک کام چوبیس گھنٹے جاری رہے گا تاکہ شہر جلد از جلد معمول کی زندگی کی طرف لوٹ سکے۔
