شدید سردیوں کے طوفان نے امریکا کو اپنی لپیٹ میں لے گیا

امریکا میں ایک طاقتور اور خطرناک سردیوں کا طوفان سرگرم ہے جو مشرقی ساحلی علاقوں اور مڈویسٹ کے وسیع حصوں میں شدید سردی، بھاری برفباری اور منجمد بارش کا خطرہ پیدا کر رہا ہے۔ ماہرین کے مطابق اس طوفان سے ملک بھر میں 20 کروڑ سے زائد افراد متاثر ہو سکتے ہیں۔

متعدد ریاستوں میں ایمرجنسی نافذ

امریکی نیشنل ویدر سروس نے خبردار کیا ہے کہ یہ موسمی صورتحال جان لیوا ثابت ہو سکتی ہے۔ جمعے سے شروع ہونے والے اس طوفان کے بعد کم از کم 16 ریاستوں میں ایمرجنسی نافذ کر دی گئی ہے تاکہ ممکنہ ہنگامی حالات سے نمٹا جا سکے۔

بڑے شہروں کو شدید برفباری کا سامنا

میمفس، نیش وِل، واشنگٹن ڈی سی، بالٹی مور، فلاڈیلفیا اور نیویارک سمیت کئی بڑے شہروں میں شدید برفباری کا خدشہ ہے۔ پیش گوئی کے مطابق کولوراڈو سے ویسٹ ورجینیا تک کے علاقوں میں، جبکہ نیویارک سٹی اور بوسٹن میں بھی ایک فٹ یا اس سے زیادہ برف پڑ سکتی ہے۔

سفری نظام متاثر، بجلی کی بندش کا خدشہ

نیشنل ویدر سروس کا کہنا ہے کہ اس طوفان کے باعث فضائی اور زمینی سفری نظام بری طرح متاثر ہو سکتا ہے، طویل دورانیے تک بجلی کی فراہمی معطل رہنے اور درختوں کو بڑے پیمانے پر نقصان پہنچنے کا امکان ہے۔

راکی پہاڑوں سے شمال مشرق تک برفباری کی پیش گوئی

محکمہ موسمیات کے مطابق جنوبی راکی پہاڑوں اور قریبی میدانی علاقوں میں شدید برفباری متوقع ہے جو مڈ اٹلانٹک ریاستوں سے ہوتی ہوئی شمال مشرقی امریکا تک پھیل سکتی ہے۔ بعض علاقوں میں برف کی موٹائی 30 سینٹی میٹر سے تجاوز کر سکتی ہے۔

نیو جرسی اور نیویارک میں بھاری برف کی وارننگ

موسمی پیش گوئی کے مطابق نیو جرسی کے شمال مشرقی حصوں اور نیویارک کے جنوب مشرقی علاقوں، جن میں نیویارک سٹی بھی شامل ہے، اتوار سے پیر کے دوران 10 سے 14 انچ برف پڑنے کا امکان ہے۔ شدید سردی کے باعث ہوا کے ساتھ محسوس ہونے والا درجۂ حرارت منفی 23 ڈگری سینٹی گریڈ تک گر سکتا ہے۔

نیو انگلینڈ میں تیز ہوائیں اور شدید سردی

جنوبی نیو انگلینڈ کے بیشتر علاقوں بشمول بوسٹن میں 12 سے 17 انچ برفباری اور 30 میل فی گھنٹہ تک تیز ہواؤں کی پیش گوئی کی گئی ہے۔ ان علاقوں میں سردی کی شدت منفی 26 ڈگری سینٹی گریڈ تک محسوس ہو سکتی ہے۔

شمالی میدانی علاقوں میں ریکارڈ سردی کا امکان

ماہرین نے خبردار کیا ہے کہ شمالی میدانی علاقوں میں سردی کے نئے ریکارڈ قائم ہو سکتے ہیں، جہاں ہوا کے ساتھ درجۂ حرارت منفی 46 ڈگری سینٹی گریڈ سے بھی نیچے جا سکتا ہے۔

جنوب مشرقی امریکا میں بھی شدید سردی کی پیش گوئی

اس کے علاوہ امریکا کے جنوب مشرقی حصوں کے بڑے علاقے میں بھی شدید سردی اور نقطۂ انجماد سے کم درجۂ حرارت متوقع ہے۔

عوام کے لیے احتیاطی ہدایات

حکام نے شہریوں کو غیر ضروری سفر سے گریز کرنے، حفاظتی اقدامات اختیار کرنے اور موسمی صورتحال سے متعلق تازہ اور مستند معلومات پر نظر رکھنے کی ہدایت کی ہے۔