علاقے بھر میں شہریوں کو اتوار کی شام گھروں میں رہنے کی ہدایت کی گئی کیونکہ درجۂ حرارت میں تیزی سے کمی کے باعث سڑکوں پر خطرناک صورتحال پیدا ہونے کا خدشہ ہے۔ حکام کے مطابق صبح ہونے والی بارش، برفانی بارش اور ژالہ باری کے بعد سڑکوں پر موجود نمی جمنے سے پھسلن پیدا ہو سکتی ہے۔ مونٹگمری کاؤنٹی کے جج مارک کیو نے شہریوں کو غیر ضروری سفر سے گریز کا مشورہ دیا۔ ان کا کہنا تھا کہ اتوار کی صبح سے درجۂ حرارت دوبارہ گرنا شروع ہو گیا ہے اور تازہ رپورٹ کے مطابق آج درجۂ حرارت نقطۂ انجماد سے اوپر جانے کا امکان نہیں۔ انہوں نے خبردار کیا کہ نمی کی موجودگی میں اوور پاسز اور پلوں پر برف جمنے کا شدید خطرہ ہے۔ جج مارک کیو کے مطابق ضلعی اور ٹیکساس محکمۂ شاہراہیں سڑکوں پر نمک اور دیگر حفاظتی اقدامات کر رہے ہیں، تاہم شہریوں کو سختی سے ہدایت دی گئی ہے کہ سڑکوں پر نکلنے سے گریز کریں۔
ہیرس کاؤنٹی حکام کی جانب سے خطرے کی وارننگ
اگرچہ بارش کا سلسلہ رک چکا ہے، تاہم ہیرس کاؤنٹی کے شیرف ایڈ گونزالیز نے کہا کہ سڑکیں اب بھی انتہائی خطرناک ہیں اور پولیس اہلکار مسلسل حادثات پر کارروائی کر رہے ہیں۔ شیرف ایڈ گونزالیز کے مطابق منجمد ہوا کا سلسلہ جنوب مشرق کی جانب بڑھ رہا ہے اور مغربی ہیرس کاؤنٹی میں درجۂ حرارت بیس ڈگری فارن ہائیٹ کے قریب ہے۔ انہوں نے کہا کہ سڑکوں پر موجود معمولی پانی بھی، خاص طور پر پلوں اور بلند مقامات پر، بلیک آئس میں تبدیل ہو رہا ہے۔ ناگزیر سفر کرنے والے شہریوں کو رفتار کم رکھنے، گاڑیوں کے درمیان مناسب فاصلہ رکھنے اور اوور پاسز سے بچنے کا مشورہ دیا گیا ہے۔
متعدد شاہراہیں بند، کئی مقامات پر برف کی اطلاع
خراب موسمی حالات کے باعث کئی اہم شاہراہوں، انٹرچینج ریمپس اور سڑکوں کو بند کر دیا گیا ہے یا وہاں برف جمنے کی اطلاع ملی ہے۔ حکام نے شہریوں سے اپیل کی ہے کہ وہ مستند ذرائع سے معلومات حاصل کریں، غیر ضروری سفر سے اجتناب کریں اور شدید سرد موسم کے دوران اپنی اور دوسروں کی حفاظت کو یقینی بنائیں۔
